بھٹکل:23/ جنوری (ایس اؤنیوز)ضلع میڈیکل آفیسر کی ہدایات پر بروز منگل ضلع صحت عامہ دفتر کے انتظامیہ آفیسر شیوگاجو نائک کی قیادت والی ٹیم بھٹکل سرکاری اسپتال کا دورہ کرتےہوئے حساب کتاب کی جانچ کی ۔

صبح سے شام تک افسران نے اسپتال کے دستاویزات اور خاص کر حساب کتاب کی تفتیش کی ۔ اس کے بعد اسپتال کا ایک ایک کمرہ گھوم پھر کر انتظامات کا جائزہ لیا ۔ اس دوران اسپتال میں صرف دو اندرونی مریض بیڈ پر تھے بقیہ تمام بیڈ خالی رہنے پر تعجب کا اظہار کرتے ہوئے اسپتال عملے سے پوچھ تاچھ کی اور پاکیزگی کے متعلق سخت تنبیہ کرتےہوئے ذمہ داری سے کام کرنے کی تاکید کی۔

اسی موقع انتظامیہ آفیسر نے تعلقہ اسپتال کے ڈاکٹر دینکر کوتعلقہ سرکاری اسپتال کے نئے میڈیکل آفیسر کے طورپر نامزد کیا۔ اسی دوران جئے کرناٹکا سنگھ کے ممبران اسپتال پہنچ کر آفیسر کے سامنے اسپتال کی بدنظمی کے متعلق بتایا۔

اسپتال کے حالیہ انتظامات کے متعلق جانکاری دیتےہوئے آفیسر شیوگاجو نے بتایا کہ تعلقہ اسپتال میں کل 15نرسیں ہونی چاہئے جب کہ صرف 9ہیں جس سے مریضوں کی دیکھ ریکھ میں دقت ہورہی ہے۔ اسی طرح فارمیسی میں بھی عملہ کی قلت ہے پرائیویٹ طورپروہاں عملے کو نامزد کیاجائےگا اور اسپتال کے کچھ ڈاکٹرس چھٹی پر ہیں تو چند ایک تربیتی کیمپ کے لئے گئے ہوئے ہیں ۔ ان سب حالات کے متعلق میڈیکل آفیسر کو رپورٹ سونپی جائے گی اور آئندہ دنوں میں اسپتال کے نظام کو بہتر کرنے کی با ت کہی۔

خیال رہے کہ بھٹکل سرکاری اسپتال کے سابقہ میڈیکل آفیسر اور چند ڈاکٹروں کے متعلق عوام اور کچھ تنظیموں نے ضلع میڈیکل آفیسر کے سامنے اسپتال کے حساب کتاب کو لے کر شکایت کرتے ہوئے جانچ کا مطالبہ کیا تھا۔ ضلع میڈیکل آفیسر نے عوامی مطالبہ کے مطابق اپنے دفتر کے انتظامیہ معاون آفیسر شیوگاجو نائک کی قیادت میں ایک ٹیم کو اسپتال کی جانچ کے لئے ارسال کیا تھا جس کے تحت جانچ ٹیم آج اسپتال پہنچ کر معائنہ کیا۔